Inilah Game Kami Era 80an

Tok tok tok, bukai lawang, (ujar nang “ajak” kisah mangatuk di luar lingkaran)

Lawang dimana? (ujar nang lain manyahut baimbai di dalam lingkaran)

Lawang di padu.

Mancari siapa?

Mancari adul (maju ai si Adul kisah mambukai lawang)

Ngaran ikam siapa? (ujar nang ajak tadi batakun)

Ngaranku Adul, ngaran ikam pang siapa?

Ngaranku .... SUNDAL BOLONG.

Maancap ai lagi Adul lawan nang lain basintup ka tangah lingkaran. Sundal Bolong nang ajak tadi bukah bakuliling handak manjapai ka dalam. Kuciakan tu pang buhannya di dalam sambil baputar mahindari jangkauan Sundal Bolong tadi. Maka bila dapatnya, saurang pulang ajak jadi hantu. Saking raminya ada nang tatilungkup, ada nang bahimat maragap kawan, ada haja nang talului salawar tatilanjang.

Pangharu pangharu siapa kana kada tahu, sum ligo ligo patah bilah kana urang mamarit. Nah itu mantra kami bahari handak mailai bilah ligo. Nang lain kacungkungan di higa ligonya nang batajak di tanah sambil bado’a dalam hati supaya ligonya jangan sampai ramuk kana hantam. Ingat ai kalo kayapa caranya maulah. Bacarian tutup Pagoda Pastilles dahulu buhannya ai. Imbahitu hanyar malilih plastik. Maka harus kunsintrasi maulahnya, mun sambil bapandir apalagi malilik binian, bisa lilih ka hibu batis. Yakin haja kuciak bunyi papar tu pang, paampihannya iya mancari pisang atawa odol gasan dikasayakan.

Ingatkah jua kakawanan istilah “Luang Sambi” lawan “Luang Ipu”. Istilah gasan main kalikir kita dahulu, bila kawa sampai luang ipu alias luang sapuluh manang am, tinggal mamijat kalikir musuh haja lagi sambil kurihing kahimungan. Nang lucutnya mun kita kalah masih di luang dua atau luang tiga, balucutan tu pang manyampaiakan luang sapuluh. Makin nang manang ni bidik maunting, bah sakit hati banar. Bisa maulit di luang dua sampai kiamat. Jadi nang mana bisa manangis hakun manangis haja, maraha basupan tapi lakas ampihan.

Lima, sapuluh, lima blas, dua puluh ....nang ajak batukup mata di tawing atau di batang pohon mahitung sampai saratus. Nang lain kujul-kujul mancari panyambunyian. Ada nang bukah ka bawah barumahan, ka higa titian, ka dalam drum, nang mana kada tapi pintar babuat dalam karung, hakun haja awak miang. Nang mana culas bukah ka dalam jamban sambil bahira dua tiga jam. Kasian nang ajak tahingus mandapatakan. Haha asa lucu maingatakan main basasambunyian awak ni. Mun kulir basambunyi mainnya bisa diganti lawan basasambunyian kayu. Nang sabuting ngini ngalih lagi. Bisa dipatak buhannya dalam tanah, kamanang mancari.

Mun wayah musim kaliangan liwar raminya jua. Hampir Saban ikungan urang baisi di rumah. Mun urang nang baduit biasanya nukar nang kartas lawan banangnya nang bagalas. Bila kada tapi baduit kaya buhan kami iya baulah bakas kantong plastik. Patiknya malirih bilah paring atau mancuntan bilah tamba kuitan. Banangnya banang jahit nang murah ha pulang. Supaya pina aksi kisah bagalas kaya urang, di bantang sakakaya hati di bawah barumahan, dipusut lawan nasi supaya ada jua landapnya. Mun pina rajinan bakas bol lampu nang putih ditumbuk halus, dicampuri lombok parawit, bawang putih bawang habang, sahang, beh.. nang kaya maulah sambal acan. Tagantung kahandak. Pinanya ilmu cucubaan haja. Mun sudah naik ka atas tatap ai kalah bagandal dapatnya banang nang larang. Raminya lagi bila pagat diatas sing ambil. Bajurut tu buhan kanakan manyasahan. Nang sangkut di pohon dinaiki, tasangkut di bubungan di juluk, hakun haja manyasah sampai ka pahumaan.

Bahari kami tamasuk kriatip nang kada tapi manyusahakan kuitan bila handak bapainan. Jarang nukar karana duitnya jua ai kada tapi balabihan. Motoran baulah surangan bakas papan, bannya sandal kapit bakas ditatak bulat lalu ditarik lawan tali ka hulu ka hilir. Ingatkah jua dahulu tutup sabun culit dipaku basubalahan lawan bilah, di bawa babukahan asa rami haja. Atau mun handak babunyian pakai balik susu di bawahnya diandaki pancatuk halus nang bakait gatah atau kalip, bila dijalanakan bannya babunyi tu balik susunya. Atau nang pina asa babungulan, bakas ban sapida digulurakan dicatuk lawan bilah sambil babukahan.

Masalah olahraga kami kada hakun jua katinggalan. Kada kawa nukar rakit, papan bakas kami gayat. Cuknya bulu hayam atau bulu itik kami kumpulakan dibuat dalam bilah haur. Mun kada lihai manangkis samisan urang, bisa dahi babinculan. Main bal dahulu bila kada tapi baduit, baadaan nukar bal plastik. Atau bila kada sing duitan sama sakali, bakas kantong plastik dikumpulakan dijarat bulat-bulat. Dua tiga sipakan tahamburan.

Kami bahari harat-harat jua marakit sanjata. Mulai dari pistol bapiluru kartas basah atau kambang jambu air sampai sinapang bamban.

Banyak ai lagi mun hakun maingatakan. Itu pang game alias mainan kami bahari era 80an nang sudah mulai hilang tunggal dikitan.

( Catatan: di beberapa tempat barangkali punya nama tersendiri berikut tata cara permainan dan kata-kata yang menyertainya. Penulis mendeskripsikan masa kecil di desa Hamayung kec. Daha Utara)